Eventyr, segner, folkeviser, folketru
– bokkveld med tekster frå samlingane
til Edvard Langset
Edvard Langset (1867–1924) er utan samanlikning den fremste folkeminnesamlaren på Nordmøre og ein av dei fremste i landet. Hadde han budd på Austlandet, og det store arbeidet hans betre kjent, hadde han nok vore sidestilt med Asbjørnsen og Moe. I samleverket «Norsk Eventyrbibliotek», bandet for Sogn og Fjordane, Møre og Romsdal er heile 45 av Langset sine eventyr med!
Edvard Langset var fødd i Halsmyra i Straumsnes. Han utdanna seg til lærar, og dei siste ti åra av livet sitt arbeidde han på Ulset skule.  
Han skreiv både romanar og skodespel og deltok ivrig i samfunnsdebatten gjennom foredrag og artiklar i aviser og tidsskrift. Han var formann i Nordmøre
Ungdomslag, styremedlem i Nordmøre Mållag, ein av stiftarane av Nordmøre Historielag og grunnleggar av bygdemuseet i Straumsnes.
Men det er altså som folkeminnesamlar han har gjort den største innsatsen. I fleire år drog han kvar sommar frå grend til grend først og fremst på Nordmøre, men også i Sør-Trøndelag og Romsdal, og han hadde ein «makelaus evne til å tala med folk og få dei til å fortelja». Dessverre er berre ein del av det han samla inn, komme i bokform, mest kjent er «Folkeeventyr frå Nordmør» frå 1921, og samlinga «Segner - Gåter - Folketru frå Nordmør» som Norsk Folkeminnelag gav ut i 1948.
Langset viste at Nordmøre er svært rikt på folkeminne, og arven etter han er det viktig å ta vare på.  
På Bokkveiden i år kan du altså bli kjent med Edvard Langset og arbeidet hans, og få innblikk i ein verdifull del av nordmørskulturen.
Det skal bli ein underhaldande kveld med musikk, song, eventyrforteljing og foredrag.
7. mai 2007 i kinosalen på Tingvoll Hotell.